танк

қуатты қарумен жарақталған, шынжыр табанды, өтімділігі жоғары, сауытты ұрыс машинасы. Т-інің негізгі элементтеріне айналмалы мұнаралы сауытты корпус, қару-жарақ, күш беретін (моторлы) қондырғы, күш берілісі, жүріс бөлігі, электр жабдықтары, бақылау аспаптары мен байланыс құралдары жатады. Т-інің ішкі корпусы төрт бөлімшеге бөлінген: басқару бөлімшесі, ұрыс бөлімшесі, күш беретін қондырғы бөлімшесі және күш берілісі бөлімшесі. Т. түрлеріне байланысты олардың мұнараларына негізгі қару-жарағы болып табылатын 76—122 мм калибрлі зеңбіректер орнатылады. Сонымен қатар Т-іде 1—3 пулемет болады. АҚШ-та, Жапонияда және Францияда реактивті қаруы бар танкілер шығарыла бастады. Т-ілерде басқарылатын ракеталарды қолдану мүмкіндігі де қарастырылуда. Қазіргі заманғы Т-інің бірқатар типтерінде су астында жүруге және радиоактивті зақымданған аймақтардан өтуге мүмкіндік беретін құрал-жабдықтар орнатылған. Қазіргі кезде Т-іде, әдетте, түнгі көру аспаптары қолданылады. Танк жойғыш құралдардың дамуы Т. сауыттарының қалыңдығын 100—200 мм-ге дейін қалыңдатуды, сондай-ақ оның корпусы мен мұнарасын жетіл-діруді талап етеді. Т. қозғалысының ең жоғарғы жылдамдығы — 45—65 км/сағ. Ол жолсыз жерлермен жүріп, бөгеттерден өте алады және оның ұзақ жүріс қоры бар. Т. салмағына, сауытталғандығына, қару-жарағына және ұрыста қолданылуына байланысты төмендегіше бөлінеді: кіші және орта калибрлі артиллериялық қару-жарақты, жеңіл-салмағы 20 т-ға дейін; қуатты қару-жарақты, орта — салмағы 40 т-ға дейін. Бұл танкілер әскерлердің негізгі соққы күші болып табылады және қарсыластың атыс құралдарын, танкілерін, тірі күштерін жоюға, сондай-ақ мотоатқыштар бөлімшелерін тікелей сүйемелдеуге арналған. Т-ілердің келесі түрі — ауыр танкілер. Олардың салмағы 40 т-дан жоғары, орта танкілерге қарағанда өте қуатты қару-жарақты болады және басты жағдайда қарсыластың танкілерін, атыс құралдарын және тірі күштерін жоюға арналады. Олардың далалық қорғаныс құрылыстарын қиратуға және жоюға, сондай-ақ қарсыластың күшті бекіністі қорғаныс позицияларын бұзуға мүмкіндіктері бар.